Partytjies en dinge

Die kinders was Saterdag al weer by 'n paar partytjies gewees ook. Hulle sosiale skedule laat ook rêrig veel te wense oor - elke naweek omtrent druk besig met ten minste een of twee partytjies wat bygewoon moet word.

Jeandré, een van Pieter se maatjies het Saterdag verjaar. Hier is een of twee foto's van die partytjie. Jeandré is ook SA'ner. Willie en Lizelle Oelofse se jonge heer. Ek het al paar keer van Willie hulle gepraat. 'n Span wat ook uit Pietersburg kom, die wêreld is regtig maar eintlik baie klein. Wie sou nou drie of vier jaar terug gedink het ons (Ek en Willie-hulle) sou saam-saam hier in BE wees? Alle geval - hier is die kinders besig om te "dress" vir die groot bos staptog.

Steven Drotské besig om die kinders mooi te verduidelik van spanne, oorlog, kodewoorde, forte en allerhande sulke dinge.


Hier het die een span so pas by hulle fort gearriveer, vlag gekry en paar gunne waarmee hulle gevangenes moes gaan bevry.

Die hele span na die tyd bymekaar.

Hierdie is eintlik maar halfhartige blog posting - nie rêrig lus om te skryf nie, maar ek wil ook nie weer agter raak met die opsit van foto's nie.

Sal maar later weer probeer om 'n beter poging aan te pak.

Oor Angus Buchan en golf

Ek wou eintlik vroeër al begin skryf het om paar foto's op die blog te sit - ek het egter verstrengel geraak in oplees oor Angus Buchan.

Dit was hierdie naweek die Mighty Men Conference op sy plaas - meer as 60 000 manne wat daar was. Ek probeer nou om soveel as moontlik te bekom oor wat alles die naweek daar gesê is, want ek verstaan die Here het kragtige werk weer daar verrig.

Angus Buchan het onder andere gepraat dat mens nie net met vyf minute se stiltetyd regtig vir God sal kan leer ken nie. Hoe waar is dit tog nie! Ons almal weet dit eintlik maar moet elke kort kort weer daaraan herinner word.

Dit was maar een van die temas waaroor Angus gesels het, daar is paar ander temas waaroor hy ook gepraat het en ek kan nie wag om notas daarvan te kry nie.

Ek en die kinders was gistermiddag by 'n golf les gewees in Sterrebeek. Ek het die kinders soontoe gevat want hulle wil miskien begin golf speel. Hulle slaan die balletjie al baie beter as wat hulle een jaar terug gedoen het - en nie asof hulle intussen eintlik enige golf gespeel het nie. Die plek waar ons 'n paar balle gaan slaan het is 'n Golf Academy hier in BE. Die plek se naam is Golflife Center - een van die beginsels van die Akademie is om jou die basiese beginsels van golf te leer en jou dan gedurig, soos jy vorder, altyd te herinner aan die basiese beginsels. Jong, ek moet sê, die beginsel maak nogal sin en het reeds vandag baie gehelp. Vandag se les was gratis en ek dink met die besigheid hou hulle ook maar by die "basics". Eerste les gratis, en nou weet hulle dat hulle die mense "gehook" gaan kry op golf, so dan sal die geld begin instroom! Daar was seker so stuk of twaalf mense vandag saam met ons daar en reeds het daar twee mense ingeskryf vir lidmaatskap. Hierdie manne weet van geld maak hoor!

Hier is paar foto's van die volgende Trevor / Retief / Anika of wie ookal. Die houding is nog nie heeltemal daar nie, maar dis net die eerste les gewees. O ja, die kinders is nie die volgende "wie ook al" nie - hulle is die enigste en beste Pieter en Marché. Vir die eerste keer het hulle rêrig nogal goed gedoen.





Altwee erg besig om te konsentreer..... Marché het 'n "grip" wat menig pro's haar sal beny!












Pieter besig om aandagtig te luister. Die man met die geel sweater se naam is Ricco. Hy is 'n Fin en bly nou so amper vyf jaar in BE. Praat darem Vlaams vlot en lyk asof hy en die kinders nog 'n paadjie gaan stap.






Die "grip" was goed, maar die "swing" van Marché kort nog bietjie werk.














Nou ja. toe ek hierdie kyk in Pieter se oë sien, toe weet ek, hy is nou hooked op golf! Dit was een van daai houe wat maak dat jy weer sal wil terug kom!












Sal kyk hoe dit gaan met die lesse en dalk sal hulle saam kan speel tydens die reunie op Nylstroom.

Kinders

Die kinders is terug van hulle Bosklasse af!

Ek het lanklaas in my lewe verlang soos hierdie week - miskien omdat ek maar net met die normale roetine dinge besig was by die kantoor - my gedagtes was gereeld by die kinders gewees. Dis nie soos as die rolle omgeruil is - ek is weg en die kinders is by die huis nie - dan kan ek die verlange nogal hanteer, maar hierdie week was nogal erg.

Die kinders kon nie uitgepraat raak oor die week nie - die gebrabbel was "non-stop" vandat ek hulle by die skool opgelaai het. Dit is regtig net eintlik 'n riem onder die hart om te weet hulle ervaar dinge wat hulle gelukkig maak - interessante dinge wat darem die verwysingsraamwerk verbreed. Ek dink hulle is die kinders hier in BE nou al ver voor. In die kort tyd wat hulle hier is het hulle al baie meer gesien en ervaar as wat die meeste van hulle portuurgroep hier ervaar het. Die Belge is maar snaakse mense - kom in 'n groef en dan sukkel hulle om daar uit te kom - eintlik maar dieselfde as ons.

Vat nou as voorbeeld - Naby Den Haag is daar die heerlikste strand - dis so ongeveer 190 km hier van die huis af - Brugge se see is weer so 140 km hiervandaan af - dis waar al die Belge gaan kuier as hulle see toe gaan. Nee wag, kom ek kwalifiseer myself, baie, nie al die Belge nie. En dan moet ek ook bysê - dis my observasie op hierdie stadium - soos wat ek mense beter leer ken is dit moontlik dat ek later tot ander insigte kan kom.

Nou wat wou ek eintlik sê? O ja, dat Brugge se see nie naastenby so feestelik is soos Den Haag se spot nie. Hoekom die mense nie net 50 km verder ry en na 'n lekkerder see toe gaan nie - dit gaan my verstand te bowe. Maar - dis waaraan hulle gewoond is - doen dit nou al vir jare so en so sal dit bly - dis eintlik wat ek wou sê - raak gewoond aan sekere maniere en dan bly daai dinge maar permanent.

Ek laat weet vanoggend vir Jacolette dat ek en die kinders so lekker gekuier het gisteraand - met my tandpyn en al - een moerske pyn wat my half blind maak in die linkeroog..... moes al lankal by die tandarts uitgekom het, maar is te skytbang vir een.

Hier het ek nou gepraat van skyt en ek het gou na Skype "geskip" om weer te chat - wraggies toe praat ons van skuit - soos in bote, kayakke en sulke dinge. Eerste keer in 'n lang tyd wat ek weer hoor iemand gebruik dieselfde bewoording as ek. Ek mis die goue tye van "Piet se Skuit"!

Terug by die kinders - ek wonder soms of ons nie te ongesond lief is vir mekaar nie, ek en die kinders. Kan daar iets wees soos ongesond lief, of te lief vir mekaar? Seker nie, maar dit maak my net bang partykeer om te weet ons is 'n hegte spannetjie, heg gebind deur baie dinge saam, pyn en avontuur. Ons drie is so afhanklik van mekaar, en dit kom net elke keer meer en meer duidelik na vore as iemand weg was vir paar dae.

Maar nou ja, ons filosofeer later. Die son is op en die voëltjies fluit - wou dit eintlik al lankal noem - dis een ding wat my opgeval het hierdie kant - ek het geen wekker nodig nie - klokslag begin mens die voëltjies reeds vroeg hoor fluit - as die voëltjies begin skarrel dan weet mens dis omtrent nog so halfuur voor dit lig word.

"Guess what" is op die spyskaart vir vandag? Aktiwiteite gewys, nie kos nie, man! Hokkie en nogmaals hokkie. Marché moet agtuur daar wees en Pieter so 11:00.

Agtermiddag gaan ons na Willie Oelofse toe - Jeandré verjaar vandag en die kinders het partytjie daar. Die kinders sien baie uit - dis 'n bos partytjie met kompasse, skuilings, klink vir my oorlog, en al sulke dinge. Dis deel van wat België so uniek maak - die bos is teen jou.... en nog belangriker..... die bos is benutbaar, sonder vrees.

Ons laat weet hoe dit was.

Die Milton's

Sout van die aarde mense. Dit was wonderlik om die Milton familie hier by ons te kon hê! Snaaks hoe mens partykeer sommer net dadelik "click" met mense. Mense uit dieselfde verwysingsraamwerk, mense met dieselfde agtergond (breë trekke). Ek het hulle begin mis die oomblik toe hulle in die kar klim om terug te ry na Parys.

Parys toe omdat Cliff daar werk - om nou behoorlik die familie uit te lê - Cliff is die jonge heer van die gesin - ongeveer drie meter lank en twee meter breed - 'n reus van 'n man. Nie rêrig twee meter breed nie, maar sy persoonlikheid maak op vir die breedte om by twee meter uit te kom - hy is nou van daai wat jy kan sê, hy vul 'n vertrek met sy teenwoordigheid! Nie om vir Pa Jimmy weg te gooi nie, boer van die Bosveld en self 'n groot man. (Lyk net klein langs Cliff) Magda is ma (self geseën met lengte) en liefderik moederlik besorg oor haar kroos. Die ander gedeelte van die kroos is Margha - Margha vir wie ek nog 'n present skuld. Die ander het almal elkeen 'n bier van België as geskenk gekry en ek wou nog België "chocolates" vir Margha koop maar kom toe agter dat 'n bier eintlik heel meer van pas sou wees. (Die bier is in die pos.... somewhere) O, ja - het ek dalk vergeet om te sê? Margha is ook nie die kortste van mense nie. So tussen alles het ek het nou die dag met 'n skok agter gekom dat ek ongeveer 3 cm in lengte gekrimp het. Die ouderdom tog! Ek dag heeltyd ek is relatief gemiddelde lengte en toe moes die kinders my herinner dat Chantel langer as ek is - dit het glad nie goed afgegaan nie. Hulle luister nou net vir my omdat ek 'n growwer stem het.

Mensig, maar ek kan tjol praat so laat in die aand (vroeg in die oggend). Gebruik maar die tyd om die blog op datum te bring want die kinders is nie by die huis nie. Hulle is besig met Bosklasse êrens in Westerloo, Chantel is in Suid Afrika en ek is "home alone". Ek gaan nie weer so 'n tyd kry om die blog op datum te bring nie. Nogal "lonely" hier by die huis en ek mis die kinders erg - eintlik jok ek - veel erger! (O ja, ter verduideliking, Bosklasse is amper dieselfde as ons ou Veldskool in SA)

Terug by die Milton's......... Cliff werk nie eintlik in Parys nie, dis sy speel plek......... vir die wat hulle rugby ken....... hy is daai lang man wat nou vir Stade de France rugby speel, het in die Blou Bulle se goeie tye daar diens gedoen..... klink lank gelede as mens praat van die Bulle se goeie tye.... in vergelyking met waar hulle nou staan. (As ek my nie self vergis nie was die goeie tye laas jaar) Ai, vat so katvis, was nog nooit 'n Blou Bul "fan" nie. Die Stormers is darem heel punt in die wind deesdae, dit gaan goed in die Kaap! Gelukkig is Cliff in Parys - so 400 km hiervandaan en nie eers sy 2,3 meter lyf sal my hier kan klap nie! Ek moet sê, nogal lugtig daarvoor.

Ewentwel, die kuier hier was baie lekker. Ek, Cliff, Margha en Chantel het een aand besluit om Brussels se gate te besoek. Net by een gat vas gehaak though, Delirium........ Dis nou die plek wat naam gemaak het omdat hulle 2000 verskillende biere verkoop, Guiness Book of Records en elke ding. Ons het 'n hele paar soorte bier die aand kaf gedraf en ek dink daar is nog net so drie wat ons nog nie geproe het nie. Hier is 'n foto waar ek liefdevol vir die kroegman vra om bier nommer 1 973 te skink. Ons het daarna nog so 24 stuks daarna probeer, maar snaaks genoeg, almal het dieselfde gessjjmaak!

"Say no more" - eerder dat die skandes uit my eie mond kom as wat mense dit op vreemde plekke hoor of lees! Cliff is in die agtergond en is self "impress" met die "order" wat ek insit by die kroegman!

Aag jong, dit was groot tye, broodnodige tye. Vriende was "great", atmosfeer was "great", " all in all" 'n wenner aand!

Chantel is nie hier by die huis om sensuur toe te pas nie - so - hier is paar foto's van daai aand, dit was heel goed:

http://picasaweb.google.co.uk/3besters/DeliriumMiltons08?authkey=lR0Hi_64SAE

"Enjoy it while it last"! Dalk verinneweer Chantel die hele album as sy terug is.

Dit was darem nie al wat ons gedoen het nie. Hier is paar foto's saam die hele span in Brussels......... by Mannekin Pis en wafels en room op die Grote Mark.

Alle geval - hier is klomp foto's van toe die Milton's hier gekuier het:

http://picasaweb.google.co.uk/3besters/BelgiMiltons08?authkey=yb6DMkbVVrg

Die Span uit die Woestyn

Terwyl ek nou besig is om te "update" - druk ek dit maar in die rooi en probeer soveel as moontlik opgesit kry.

Die dag breek al grou oor die oosterkim............... of so iets....... eintlik maar net sê, oor 'n uur of wat begin die geskarrel alweer en dan moet ek vir Marché by Chi-Chi's hê want sy is op pad hokkie toe. Speel by 'n plek met die naam van Egnberg, of so iets. Ek moet vir Pieter self later vanoggend Leuven toe vat, want hy speel daar hokkie. Marché was juis gisteraand heel hartseer dat ek nie saam met haar kan gaan vandag nie, nogal moeilik om jouself in twee te split. Pieter het 'n maatjie wat hier geslaap het gisteraand - sy naam is Daniël - ek dink met 'n deelteken - alle geval - die Engelse Daniel - gelukkig is die mannetjie nie rêrig Engels nie - hy is Portugees, want sou hy Engels gewees het sou Pieter nie toegelaat het dat Daniel hier bly nie - die man (Pieter) het mos geen sin in die Engelse nie - die konsentrasiekamp stories was vir hom net een te veel - en die feit dat hulle met die Voortrekker aktiwiteite nog die graffies moes gaan skoonmaak - dit was maar eintlik net die brandyster wat dit vasgebrand het in die geheue - ons mis nogal die Voortrekkers met al die aktiwiteite, die vriende, die samesyn dit was darem heng lekker.

Hier is paar foto's van ons tyd by die Voortrekkers - een of twee foto's ter herinnering aan Oom Hardus en Tannie Trienie se plaas op All Days - goue tye..............

O ja, voor ek vergeet, gepraat van Chi-Chi's, dis nou die local Spur en is Overijse se weergawe van 'n Steakhouse - heel aangename plek en ons het darem al een keer daar gaan eet. Daar is egter genoeg ander plekkies om by te kuier en te eet en mens kom nie regtig by 'n Steakhouse uit nie - dis nie hoog op die prioriteitslys hier nie. Alle geval hier is 'n foto wat ek nou net geneem het toe ek vir Marché gaan aflaai het.

Ek praat nou die aand met Héleen Robbertze (Van der Merwe) oor Google Earth en toe dog ek ek wil graag kyk of ek Google Earth kan intrek op die blog........ wel hier is 'n "spot" waar ons nogal lekker kuier. Overijse se Begintjesbad. Dis 'n binnenshuise swembad met 'n wildwaterbaan (BE se naam vir Supertube)

Heng, great stuff!!! Ek het nie gedink ek sou dit reg kry nie - if your good, your good! Mense, van nou af - weet net, julle gaan toegegooi word onder Google Earth foto's. Plaas van dat ek ginnegaap om te verduidelik waar dit is - "read and look for yourself"! Die wildwaterbaan is die ligblou gedeelte in die middel van die foto - alles binne so 'n tipe glas huis - die lang dak net regs van die ligblou - dis omtrent die restaurantjie en die groot dak regs is 'n olimpiese standaard swembad - die Belge is nogal heel swem bedinges ook - baie lekker.

Die kinders het 'n staande afspraak om elke Vrydagaand daar te gaan swem tussen 19:00 en 21:00. Daar is 'n klein restaurantjie daar en as ek nou nie lus het om tikkertjie saam die kinders op die wildwaterbaan te speel nie........ nou ja....... dan nuttig ek 'n glasie wyn of biertjie in die restaurant. Let wel..... ek nuttig 'n glasie wyn....... ek gaan nie wyn suip soos ander mense my toedig nie. (So bietjie binnepret in 'n rigting - ek weet dit sal tref)

Man, ek voel nou "tjaffed" met myself oor die Google Earth ding - voor ek verder gaan, sommer so 'n vinnige een uit die heup uit - hier is ons huis in Overijse.

Nou ja, weer terug by die blog - wat op aarde het al hierdie gebrabbel en dinge te doen met die opskrif hierbo - "Die Span uit die Woestyn"? Absoluut niks - dis nou maar weer net ek wat van een ding na die ander spring en glad nie by 'n punt kan begin nie.

Die Span uit die Woestyn - dis nou die Van Vuurens. Marlene en haar jongspan tweeling, Renier en Annika het hier kom vakansie hou vir 'n klomp dae en dit was een heel besige tyd wat ons gehad het om die meeste van die "been there - done that - dinge" te doen.

Die span het hulleself reguit uit die woestyn binne 'n klomp sneeu vasgeloop. Lentedag hier in BE is amptelik die 21ste Maart, maar toe kry ons wraggies sneeu op 25 en 26 Maart. Hier is paar foto's van die sneeu.

Marlene het so 'n fancy kamera waarmee sy al wat 'n sneeuvlokkie is wou afneem, maar die beligting moes elke keer gestel word want sy het nou net 'n fotografie kursus gedoen, mense wat fotografie kursusse deurloop het, mag nie foto's op "idiot mode" neem nie - jy moet die beligting stel. Mensig, was die kinders darem ontstig daaroor - tot my twee het nou al kamera sku geraak - Marlene het vir hulle 'n kamera knou gegee wat hulle nie maklik sal vergeet nie.

Vir enige een wat die blog gevolg het tot nou - dit het nie rêrig so lank gevat om vir Marché by die hokkie af te laai nie - het ge - "side tracked" geraak met ander dinge, en kom nou eers weer by die blog uit!

Ewenwel - hier is nog paar foto's van die sneeu.

En die Oerthe rivier wat in vloed was as gevolg van die sneeu.

Met dit alles as intree rede - (ja nee, verwag maar 'n lang "posting") - hier is alles wat ons saam met die Van Vuuren's aangevang het..... Min of meer in volgorde van gebeure - ek kan nie meer onthou presies wanneer het wat gebeur nie, ons was bietjie besig en het baie dinge gedoen in 'n baie kort tydjie. Soos Johan sê, "we tried to drink water from a fire hydrant" - daar was net te veel, te vinnig om alles behoorlik te kon doen.

Nietemin, alles was goed.

Jong, nou dat ek daaraan dink, bogger in elk geval die chronologiese volgorde. Hier is wat ons alles gedoen het - "mentioned randomly".

Ons was een dag Monchau en Durbuy toe gewees. Die geskiedenis agter die storie is as volg:

Monchau word geag die kleinste dorpie in Duitsland te wees, en .... veg om aanspraak te maak om die kleinste dorpie in Europa te wees. Durbuys weer, word geag die kleinste dorpie in België te wees, en.... maak aanspraak om die kleinste dorpie in Europa te wees. Wie die uiteindelike wenner is, sal niemand weet nie. (Ek dink in elk geval nie een van hulle is die kleinste nie - dis maar net 'n toeriste "gimmick") Alle geval - albei plekke is baie mooi en as ek self moet sê - ek verkies Durbuys - hoekom? - want een van die dae gaan ons daar kano ry op die Oerthe rivier. Daar gaan paar klassieke foto's uitkom - so - hou die spasie dop.... Ons gaan piekniek binne die rivier hou!

Hier is die "link" vir die album:

http://picasaweb.google.co.uk/3besters/MonchauDurbuysMrt0802?authkey=rUSq9Te36Eg

Ons was ook by Brugge en Gent gewees. Beide dorpe baie mooi en daar is klompe geskiedenis agter elke dorp. Almal wat ooit in België was raai almal aan om ten minste Brugge te gaan besoek - blykbaar die "Klein Venesië" van Europa. Helaas, ek vind Gent meer mooi en en daar is baie meer interessante dinge daar - met dit gesê - smaak sal altyd verskil. Die plek kan wat my betref, ook maar deurgaan as "Klein Venesië" aangesien daar ook baie kanale is - die twee stede (regstelling van netnou se dorpe) is immers maar 40 km uitmekaar en daar is tot 'n kanaal wat die twee stede verbind.

Hier is die "link" vir Gent:

http://picasaweb.google.co.uk/3besters/GentMrt08?authkey=0IYV5bHTrAg

En ook vir Brugge:

http://picasaweb.google.co.uk/3besters/BruggeMrt08?authkey=pqMwu2N2i9c

Eie aan België was ons ook natuurlik in Brussels - die "been there, done that" foto's is geneem (Mannekin Pis en wafels en room). So ook die "Strip Museum". Dis nou nie Teazers se strip nie - "Strips" is "comics" in België - Tin Tin, of te wel Kuifie het sy oorsprong in België.

Hier is die "links" daarvoor:

http://picasaweb.google.co.uk/3besters/StripMuseumMrt08?authkey=05fHHzM1j5I

Ook weer by Waterloo gewees waar ons weer herinner is hoe Napoleon sy alie gesien het. Die bult op die foto's het amper drie honderd trappe - ek het dit die afgelope ruk 'n rekord van vyf keer in drie weke uitgeklim.

Wat natuurlik erg lekker was, was om die tweeling (Annika en Renier) op hul verjaarsdag te kon vat na Nederland waar hulle kon ski. Ek noem Annika eerste want sy is blykbaar 15 minute vroeër gebore as Renier... weet nou nog nie hoe waar dit is nie, persoonlik dink ek dis maar 'n samesweerdery van vroue teen die mans.

Ons het gelukkig 'n GPS in die kar gehad en kon darem reguit na die ski-plek toe ry.... in Nederland. "However"........... ek lees party mense sê ons het verdwaal (Chantel se blog) - dit was natuurlik glad nie die geval nie - ons het net vir so 'n vinnige "sightseeing trip" deur Duitsland gegaan voordat ons gaan ski het.... in Nederland - ek meen nou maar - moet darem vir die Woestynmense soveel as moontlik van Europa wys! Die ski was baie pret en die foto's eintlik rêrig min. Dit gaan hopeloos te vinnig en daar is hopeloos te veel valle om heeltyd kamera in die hand te kan staan. Selwers het besluit om te probeer "snowboard" en het verskeie keer harpuis geruik - ek het eers na ongeveer drie ure kon sê ek kon 'n "slope" "snowboard" sonder dat ek hard geval het. Let wel - nie glad nie geval het nie - net nie hard geval het nie! Pieter en Marché verbaas my meer en meer by die dag, hulle het soos ou bedrywige skiërs geski.

Vinnig twee foto's van hulle:

(Duidelik was ek in Pieter se pad gewees vir hierdie foto!)




O ja, ek was ook daar tussenin gewees - die mees respektabele foto van my wat seker geplaas kan word - hier was ek ten minste nog op my voete gewees!

Die "link" vir al die Snow World" foto's:

http://picasaweb.google.co.uk/3besters/SnowWorldMrt08?authkey=E12pvc0lPDw

Verder was ons nog by Keukenhof ook gewees - dis die blommeplek in Nederland. Die blomme was nou nie van die beste nie, maar dit bly 'n belewenis. Ook sommer daar en dan gesien dat Nederland vir ons veel meer bied as net Keukenhof. Den Haag is nie te ver van ons af nie en is 'n baie lekker "see" om te gaan kuier- Ons sal definitief nou in die somer daar gaan swem - "watch this space".

Hier is die "link" vir Keukenhof en Den Haag.

http://picasaweb.google.co.uk/3besters/Keukenhof08?authkey=zNRy7SkIx8A

Maggies, amper vergeet ek, ons was nog op 'n stadium in Amsterdam ook. Hier is die foto's daarvan. Ek en die kinders was by die was museum (Madam Tussuad), die Rijksmuseum, Van Gogh Museum, ons het bootjies gery, aandete geëet..... waar Chantel en Marlene al die plekke was, dit sal ek nou glad nie weet nie! "Link":

http://picasaweb.google.co.uk/3besters/AmsterdamMrt0802?authkey=xlpUncpLpIo

Klomp algemen foto's ook in die volgende "links":

http://picasaweb.google.co.uk/3besters/Paasfees08?authkey=tbmv6UVJMcw

Dit was regtig 'n baie lekker tyd en ons het almal ons self gate uit geniet.

Om terug te kom na Marlene se fotografie - goue tye vasgevang op 'n spesiale manier. Dit was goed.

Ai, die aand raak lank, amper vergeet ek die foto's van Mini-Europe. Dis nou waar jy vele plekke van Europa kan sien sonder om regtig soontoe te gaan. Hier is paar foto's van die plek:

http://picasaweb.google.co.uk/3besters/MiniEuropeMrt0802?authkey=W646vrgDdi8

"Somewhere" het ek die foto's van Waterloo en Brussels se Mannekin Pis en wafels en room gemis. Dit sal weldra met tyd uit kom. Byskrifte by al die foto's sal ook nog bygesit word ter verduideliking.

Nou moet ek nog net die Miltons se besoek op die blog kry en dan is alles min of meer op datum.......... tot volgende week as die Van Dyks hier aanland........ dan begin ons maar weer van voor af! Ek sien regtig uit na die span se besoek en kan nie wag dat hulle moet kom kuier nie. Die plan is om bietjie weg te breek van die wafels en room af en bietjie 'n kaasbord te gaan probeer by Delirium - daar is hoeka nog 'n paar biere wat wag om geproe te word!

Jarries se besoek

Seker rêrig hoog tyd dat ek weer begin om die blog te update.

Jarries was toe soos beloof nou die dag hier by ons in BE. Die naweek het aanvanklik wankelrig begin (my toedoen) maar ons het vrek lekker gekuier.

Nou wel, oor die wankelrige begin wat my toedoen was, nie eintlik rêrig my toedoen nie. Eintlik BA se toedoen. Ek het nou 'n beginselbesluit geneem: Pieter Bester vlieg in sy lewe nie weer BA nie. Die laaste drie keer wat ek met hulle gevlieg het, het ek een - my bagasie verloor, twee - daar was twee vlugte direk na mekaar gekanselleer terwyl ek bitter graag by die kinders wou uitkom na ek 'n week uitstedig was en drie - weer 'n vlug gekanselleer toe ek ook bitter graag by die huis wou kom omdat Jarries al vir my by die huis sit en wag het.

Nou kyk, as jy 'n ou wou sien wat rondtrippel soos 'n man wat 'n warm aartappel êrens opgedruk gehad het, dan moes jy my sien op daai Heathrow. Verdomp - hier sit 'n pêl van my by die huis en wag, hom goed 12 jaar laas gesien en weet.... elke minuut se vertraging beteken dat ons minder sal moet slaap want die tyd vir gesels en kuier is baie beperk. Jarries moes nog weer terug Amsterdam toe en dan weer vort Italië toe. (En ek het gedink ek raak so dan en wan bietjie besig.......)

Hulle ( Die Engelse - wil hulle nie eintlik eers by name noem nie) was besig met die inwyding van Terminal 5 op Heathrow - die Queen en almal was daar en ons gewone boertjies moes maar sit en wag dat die gefuif eers kon end kry voordat ons kon huis toe gaan.

Ek het hoeka vroeër daai dag by Windsor kasteel verby gery en toe sê die taxi drywer vir my die vlag is af.................., sommer so heel "matter of factly". Ek sê toe "So....." menende sy pommie waarnemingsvermoë verveel my erg. Toe sê die man - as die Queen nie by die huis is nie, is daar nie 'n vlag wat wapper op die kasteel nie. Min het ek toe nog geweet dat hierdie feit - die Queen wat nie by die huis is nie - tot veel ergernis vir my sou ly.

Kyk, klein Pieter is juis nie te danig met al wat Engelsman is nie, die Boere oorlog het te groot impak op hom gehad. Toe hy nog hoor dis die Queen se skuld dat sy pa laat by die huis is, was dit net een te veel.

Die kuier was hond lekker - ek en Jarries het gesit en gesels tot vroeg oggend - op daai stadium was slaap 'n lastigheid waarsonder ek bitter graag sou wou klaarkom.

Dit was die sonsopkoms die volgende oggend - ons het darem nie heelnag gesels nie - ons het darem intussen al geslaap ook.

Ons het darem tyd gehad om 'n paar plekkies te gaan kyk - hier is mos net markte in elke dorp/stad. Al die plekke het mos maar ontwikkel rondom die gemeenskaplike mark - vandaar al die ou geboue by al die markte. Ek sê nou in laasweek vir mense van Northam se wêreld - en ons dink die Kasteel in die Kaap is oud.

Alle geval - ek spring al weer rond soos kan kom en kan nie by een punt hou en dit eers klaar maak nie - ek het vir Pieter J die Saterdag na een of twee geboue gevat en dit was nogal heel goed. Ek het twee ander pêlle van my gebel, Steven en Miriam Drotské, en hulle het gou saam met ons 'n bier gaan drink in Mechellen.

Dis nou hierdie foto.

Verder was daar heel veel dinge om te sien en te beleef en ek moet darem sê: Vir Steven en Miriam moet mens eintlik saamvat na enige plek waar jy gaan in BE - albei van hulle is lopende ensiklopedieë wat alles weet van elke gebou in BE.

Wel, ek oordryf seker so bietjie - seker nie elke gebou in BE nie, maar definitief elke tweede gebou! Veral die in die Vlaamse gedeelte van BE - sien - Steven is eintlik ook Suid Afrikaner, woon al elf jaar of so hier in BE en is getroud met Miriam, self 'n BE boorling.

Yip, Stefaans se van is Drotské - neef van annerman wat die Cheetahs afrig - vanmiddag gaan hulle alle geval hulle gatte sien op Nuweland teen die Stormers.

Heng, maar dit was great om vir Jarries te sien. Ons het paar Belgiese biere saam deurgewerk en het tot gebraai op regte mopanie wat ek nog van SA af saam gebring het. Ons het ook die normale ding gedoen - wafels en room op die grote mark in Brussels gaan eet en "gepose" vir 'n foto by Mannekin Pis. Dis nou al tradisie hier - almal wat kom kuier moet gaan "pose" vir 'n foto by Mannekin Pis. Ek kan al omtrent een hele album maak net met almal wat saam met ons by Mannekin Pis "gepose" het. Jarries skuld my nog klompe foto's aangesien die meeste van die foto's met sy fancy kamera geneem is. Ek wonder maar wanneer ek dit eendag gaan kry.

Alle geval, hier is die kinders darem daai dag by Mannekin Pis.

Mannekin Pis se storie sal ek ook nog een of ander tyd vertel - daar is eintlik paar stories - weet nie watter een is nou eintlik die een wat die Belge glo nie - alle geval - hierdie beeldjie is die "real Mcoy" wat staan en pieps - nie sommer enige hierjy sementafgietsel duplikaat wat êrens in iemand se tuin staan en die paddavis pond vol hou nie. Hy het die dag klere aangehad, maar later ook meer daaroor - as ek dit nie mis het nie is dit die enigste standbeeld in die wêreld wat oor sy eie "wardrobe" beskik! Ek dink iets soos oor die 300 uitrustings of iets - kan meer ook wees, kan nie meer onthou nie.

Pieter J se besoek was net goed gewees vir ons - met sy besoek sou ek mos agterkom dat die Belge tot ook 'n Jeanneke Pis het - lyk my die span hierdie kant is skoon skuins pieps bedinges. Hier is 'n foto van Jeanneke - sy het nie eintlik iets sinvols om by te dra nie en is eers in 1985 opgerig deur een of ander Belg met 'n sin vir humor. (Belgies)

Aai tog, ek wou nie eintlik nie, maar hier is 'n nader foto, want mens kan nie die beeldjie mooi uitmaak agter die tralies nie.

Die ineteressantste plek was egter net agter Jeanneke Pis gewees - Delirium restaurant - hier het ek en Jarries uitgevind dat hierdie plek in 2004 opgeneem is in die Guiness book of Records vir die grootste verskeidenheid bier in die wêreld - 2000 van hulle - en raai wat??? Jarries sal moet terugkom BE toe om weer te kom kuier, want ons het nie een daar kon drink nie - die plek was nog gesluit toe ons daar verby is.

Nou ja, omdat Jarries nou nog nie die foto's gestuur het nie kan ek nie nou vir julle die foto's wys van hierdie plek nie. Ek was darem nou al paar keer intussen by die plek en het begin afwerk aan die 2000 biersoorte - ek dink na die laaste aand wat ek, Cliff, Chantel en Margha daar was is daar nog net so sewe wat ons nog nie geproe het nie! Oor die trippie vertel ek later bietjie meer dan sit ek sommer die foto's van daai tyd by - dit was saam pêlle van Chantel wat saam met hul ouers van Northam hier kom kuier het. (Cliff bly in Parys en die familie het vir hom daar gaan kuier - Chantel was ook een naweek daar by hom in Parys)

Nietemin, dit was met erge ontsteltenis wat ek vir Jarries op Schipol moes gaan aflaai - heel onlekker gewees, hoor! Ek hoop regtig om binnekort weer te kan saam kuier.

Aag, what the heck - sommer net sommer, hier is ek en die kinders besig om die wafel te eet by die Grote Mark met Jarries se besoek.